शिक्षण हक्क कायद्यांतर्गत (RTE) होणाऱ्या प्रवेश प्रक्रियेत शासनाने लागू केलेल्या एक किलोमीटरचा नियम बदलून पाच किलोमीटर करण्यात यावा. महाराष्ट्र विद्यार्थी सेनेचे गटशिक्षणाधिकाऱ्यांना निवेदन
शिर्डी: (
प्रतिनिधी)
शिक्षण हक्क कायद्यांतर्गत (RTE) होणाऱ्या प्रवेश प्रक्रियेत शासनाने लागू केलेला १ किलोमीटरचा नियम जाचक असून, तो बदलून ५ किलोमीटर करण्यात यावा व पोर्टलवरील तांत्रिक त्रुटी दूर कराव्यात, या मागणीसाठी आज महाराष्ट्र विद्यार्थी सेनेच्या वतीने शिर्डी येथील माननीय गटशिक्षणाधिकारी यांना निवेदन देण्यात आले.
शासनाच्या नवीन सूत्रानुसार, १ किलोमीटर अंतरावरील शाळा निवडण्याची अट घालण्यात आली आहे. मात्र, यामुळे पालकांना मर्यादित पर्याय उपलब्ध होत असून अनेक विद्यार्थी चांगल्या शिक्षणापासून वंचित राहण्याची भीती निर्माण झाली आहे. ही मर्यादा ५ किलोमीटर पर्यंत वाढवावी, जेणेकरून विद्यार्थ्यांना त्यांच्या परिसरातील अधिक शाळा निवडता येतील, अशी मागणी निवेदनात करण्यात आली आहे.
तसेच, आरटीईच्या ऑनलाईन पोर्टलवर अनेक नामांकित शाळांची नावे तांत्रिक कारणांमुळे दिसत नाहीत. यामुळे पालकांमध्ये संभ्रमाचे वातावरण आहे. या शाळा तांत्रिक प्रक्रियेत त्वरित समाविष्ट कराव्यात, अशी आग्रही मागणी विद्यार्थी सेनेने केली आहे.
याप्रसंगी महाराष्ट्र विद्यार्थी सेनेचे शिर्डी शहराध्यक्ष प्रशांत रवींद्र वाघचौरे, अभिषेक पोपलघट, गौरव भालेराव, चेतन झिंजाड, रुषी धिवर यांसह संघटनेचे इतर पदाधिकारी व कार्यकर्ते मोठ्या संख्येने उपस्थित होते.
